“Mae pobl yn ddiolchgar bod ganddyn nhw le diogel i ddod iddo, maen nhw’n gwybod os ydyn nhw’n dod aton ni, wnawn ni eu helpu nhw.”  

Kate McShane, Rheolwr Prosiect

Mae’r caffi cymunedol wedi ail agor yn ddiweddar yn dilyn cyfyngiadau COVID. Nawr, mae yna 50-60 o bobl yn ymweld yn wythnosol, ac mae’r rhif yna’n tyfu bob wythnos. Mae’r caffi cymunedol yn darparu prydau bwyd ar gyfer unrhyw un sydd angen un, am rodd awgrymedig, neu am ddim. Ar foreau Gwener mae’r caffi cymunedol yn rhedeg eu Canolfan Gyfeillgarwch, gyda hyd at 40 o bobl yn ymweld. Darpara’r Ganolfan Gyfeillgarwch le i bobl sydd wedi’u hynysu yn gymdeithasol i ddod ynghyd i wneud ffrindiau dros bryd o fwyd twym.

“Rwy’ wedi gweld pobl yn mynd i’r  caffi cymunedol a chymryd mantais o’r prydau bwyd.  Roedden nhw, o bosib, yn unig,  wedi’u hynysu yn gymdeithasol, ac yn dod i’r caffi cymunedol achos ei fod yn cynnig cyfle iddyn nhw wneud ffrindiau newydd.”

Kate McShane, Rheolwr Prosiect

Yn rhan o’r Ganolfan Gyfeillgarwch, mae sesiynau crefft sy’n cael eu cynnal gan artist preswyl Myrtle House. Yn y sesiynau mae ymwelwyr yn creu eitemau sydd o werth iddynt. Hefyd, mae yna ddosbarthiadau dawns a symud yn cael eu cynnal yn y Ganolfan Gyfeillgarwch, i annog defnyddwyr gwasanaeth hŷn i symud ac i wella’u cydbwysedd a sefydlogrwydd craidd. Mae’r Ganolfan Gyfeillgarwch wedi dod yn lle hanfodol i bobl leol ymweld â hi.

“Mae’n rhoi seibiant i mi oddi wrth fy ngŵr.  Mae angen seibiant arna i achos mae ganddo fe broblemau iechyd a dw i’n meddwl ei fod e’n dioddef ychydig o ddementia.  Rwy’n ei ffeindio’n anodd, ac rwy’n teimlo fy mod yn ymdopi’n well os ydw in cael seibiant.” –

Beverly, defnyddiwr gwasanaeth

Daw llawer o’r bwyd sy’n cael ei ddefnyddio yn y prydau yn y caffi cymunedol ac yn ystod y Ganolfan Gyfeillgarwch gan FareShare Cymru a FareShare Go. Mae’r amrywiaeth eang o fwyd wedi golygu bod y rhai sy’n ymweld â Myrtle House yn gallu cael pryd twym, iachus, gyda rhai pobl na fyddai wedi bwyta’r diwrnod hwnnw oni bai am hyn. Gan fod y bwyd gan FareShare Cymru yn amrywio o wythnos i wythnos, dydy’r caffi ddim yn gweithredu bwydlen osod bellach, nawr mae’n cynnig amrywiaeth i ymwelwyr, gyda phrydau gwahanol bob dydd.

“O’r blaen, bwydlen osod oedd hi.  Nawr rydym yn gallu dweud “O, beth sydd wedi dod heddiw?  Beth sydd i ginio heddiw? ”

Susan, Gwirfoddolwr

Gan fod rhaid i Myrtle House godi’r holl arian sydd ei angen arnyn nhw ar gyfer eu prosiectau cymunedol, mae arwyddo fel aelod FareShare wedi arbed arian iddyn nhw, arian maen nhw wedi gallu buddsoddi mewn mannau eraill. Mae’r bwyd hefyd wedi eu galluogi i ddarparu mynediad at fwyd ffres i bobl, a bwydo mwy o bobl yn gyffredinol.

“Mae wedi bod o fudd i ni yn ariannol achos bod rhaid i ni godi’r holl arian i wneud ein holl waith cymunedol, ac mae bwydo pobl yn costio arian, felly mae bwyd FareShare Cymru wir wedi helpu.” 

Kate McShane, Rheolwr Prosiect

Trwy gyfrwng eu caffi cymunedol a’r Ganolfan Gyfeillgarwch, mae Myrtle House yn darparu wyneb cyfeillgar, a lle diogel gyda phryd cynnes i’r sawl sydd angen yn eu cymuned

“Dw i’n meddwl bod Myrtle House yn rhedeg ar fwyd da, sgwrs dda a chwmni da

Carol Roberts, Cydlynydd Banc Bwyd.

The post “Fel teulu, mae’n rhaid ichi fwyta gyda’ch gilydd. A dyma rydyn ni’n ei wneud fan hyn” appeared first on FareShare Cymru.

“Mae Foodshare yn cyflawni pwrpas pwysig iawn yn ein cymuned leol”

Angela Baker-Earle, Cydlynydd Foodshare

Dim ond un yn unig o’r prosiectau a gynhelir yng Nghanolfan CF61 yw Foodshare Llanilltud. Yn ogystal â chael mynediad at fwyd ffres ac oer am ddim unwaith yr wythnos, gall trigolion elwa o gaffi cymunedol rheolaidd, cyfnewid hadau, llyfrgell fenthyca a siop ddiwastraff. Mae hyn yn gwneud CF61 hyd yn oed yn fwy hanfodol i’r ardal.

“Rwy’n meddwl mai’r mwyaf o bethau y gallwn ni wneud tra bod Foodshare yn digwydd, y gorau. Mae’n creu mwy o ymdeimlad o gymuned.”

Angela Baker-Earle, Cydlynydd Foodshare

Mae llawer o bobl yn ymweld â Foodshare Llanilltud oherwydd eu bod yn cael trafferth gyda’r cynnydd mewn costau byw a, thrwy ddefnyddio’r gwasanaeth, mae ganddynt fynediad at fwyd na fyddent efallai wedi gallu ei fforddio fel arall.

“Dw i ddim yn tueddu prynu cymaint o bethau ffres achos ei fod e mor ddrud gwneud. Rydw i wedi cael mafon yma heddiw. Yn y siop arferol maen nhw mor ddrud, mae’n gwneud i mi beidio â’u dewis.”

MICHELLE, DEFNYDDIWR GWASANAETH FOODSHARE

Mae trigolion Llanilltud Fawr yn gyfyngedig o ran y lleoedd y gallant siopa’n lleol, ac felly efallai y cânt eu gorfodi i dalu prisiau na allant eu fforddio. Nod Foodshare Llanilltud yw darparu gwasaneth dros dro i unigolion sy’n cael trafferthion ariannol gyda’u siopa wythnosol, tra hefyd yn cefnogi’r rhai na fyddai’n cael unrhyw fwyd heb y gwasanaeth.

“O gael y rhaglen hon, ry’n ni’n gobeithio y gallwn atal pobl rhag mynd i’r angen dirfawr yna o beidio â chael digon o fwyd.”

Angela Baker-Earle, Cydlynydd Foodshare

Nod FareShare Cymru yw darparu amrywiaeth eang o fwydydd a chynnyrch ffres i bob aelod, yn dibynnu ar ba fwyd dros ben sydd ar gael. Mae hyn yn golygu nad yw defnyddwyr Foodshare Llanilltud yn gyfyngedig o ran dewis.

“Nid yw’r ffaith na allwch chi fforddio bwyd yn golygu nad oes gennych yr hawl i wneud dewisiadau am yr hyn yr hoffech chi ei fwyta, yr hyn yr hoffech chi ei fwydo i’ch teulu. Mae FareShare yn ein galluogi i ddarparu mwy o ddewis, bwyd mwy ffres a mwy o opsiynau protein”

Angela Baker-Earle, Cydlynydd Foodshare

Daeth Foodshare Llanilltud allan o brosiect o’r enw Rebuild a ddechreuodd dros 2 flynedd yn ôl, i gefnogi pobl sy’n byw yn Llanilltud Fawr. Bellach mae gan Foodshare tua 45 o ddefnyddwyr wythnosol ac mae’n trin pawb â pharch a charedigrwydd.

“Yr wythnos ddiwethaf fe gawson ni lawer o flodau oherwydd ei fod ar ôl Sul y Mamau… ac roedd cymaint o bobl mor hapus i gerdded i ffwrdd gyda thusw o flodau. Mae’n ymwneud â’r pethau bychain. Ac i bobl sy’n defnyddio Foodshare yn aml iawn mae’r pethau hynny cyn bwysiced â chael y bwyd.”

Angela Baker-Earle, Cydlynydd Foodshare

The post Rhannu bwyd yn cyflawni pwrpas pwysig yn Llanilltud Fawr appeared first on FareShare Cymru.

“Rydyn ni wedi bod yn gweithio gyda FareShare ers y dechrau. Fe ddanfonon ni gannoedd o lythyron pan agoron ni gyntaf i fusnesau lleol yn gofyn a oedden nhw’n barod i roi eu bwyd dros ben i ni, a chawson ni ddim un ymateb. O ganlyniad fe ddechreuon ni edrych ar fodelau eraill, a dyna pryd y darganfyddom ni FareShare.”

Ellie Phillips, ARWEINYDD TÎM, Tŷ MATTHEW

Oherwydd y bartneriaeth gyda FareShare, gall Tŷ Matthew gadw’r sefydliad i fynd. “Rydym ni wedi’n lleoli mewn eglwys fawr, felly mae’n biliau ni’n ddrud iawn. Pe baem ni’n gorfod talu am fwyd, fyddai’n stori wahanol iawn.”

Creu cuisine blasus

Rydyn ni’n derbyn cynnyrch becws a gwreiddlysiau gan yr archfarchnadoedd. Gyda FareShare Cymru rydyn ni’n derbyn llawer mwy o gig, pysgod a chynnyrch llaeth.

Ellie Phillips

Gyda chymorth cynhwysion FareShare, mae Caffi Matt wedi mynd o weini 30 pryd y dydd i 300. Mae gan y sefydliad 110 o wirfoddolwyr a phedwar aelod o staff sy’n trawsnewid cynhwysion FareShare yn brydau bwyd blasus a maethlon.

Gyda’r cyflenwadau bwyd hyn, mae’r tîm yn ceisio bod yn greadigol a defnyddio cymaint o gynhwysion ag sy’n bosib.

[Fe ddefnyddiwn] salad ffres a ffrwythau fel cyfwyd i’r brif fwydlen. Dydyn ni ddim yn gwneud brecwast ragor, ond cyn Covid roedden ni’n arfer darparu brecwast, a gobeithiwn wneud eto yn y dyfodol. “Rydyn ni hefyd wedi gwneud pwdin bara menyn, peis pysgod, tsili, cyri, a phob math o bethau. Rydyn ni’n defnyddio pob dim y derbyniwn ni. Ychydig wythnosau yn ôl fe gawson ni melon ddŵr enfawr a nythod meringue. Rydyn ni hefyd wedi cael byrgyrs cig carw, roedd hynny’n rhywbeth unigryw ar y fwydlen.

Ellie Phillips

Cefnogi’r gymuned leol yn ystod cyfnod digynsail

Pan aeth y byd i mewn i gyfnod clo yn ystod Mawrth 2020, parhaodd Tŷ Matthew i ddarparu bwyd i’r gymuned. Fel y dechreuodd y cyfyngiadau godi, agorodd yr elusen ei hardal tu allan fel gwasanaeth têcawê, sydd nawr yn darparu bwyd i tua 120 o bobl y dydd.

Gyda’r pandemig yn dal i effeithio ar bobl, a’r cynnydd yng nghostau byw ar draws y D.U., creodd Tŷ Matthew restr o fwydydd nad oedd angen arnyn nhw ar gyfer eu bwydlenni ar gyfer cynllun rhannu bwyd.

Ni ddylai pobl orfod dewis rhwng bwyd a chysur sylfaenol. Mae pobl bendant yn cael trafferth fforddio pethau. Rydyn ni’n clywed llawer o bobl yn sôn am gostau gwasanaethau sy’n rhy uchel, felly maen nhw’n troi aton ni am gymorth gyda bwyd. Rydyn ni wedi gweld llawer mwy o bobl yn dibynnu ar ein cynllun rhannu bwyd nag oedden ni gynt.

Ellie Phillips

Bondio dros fwyd

Yn ogystal â mynd i’r afael â thlodi bwyd, mae Caffi Matt yn lle diogel i bobl fwynhau pryd o fwyd twym a chwmni eraill.

Dw i’n meddwl bod pobl wir yn bondio dros fwyd. Mae’n ffordd hawdd o wneud i rywun wenu ac i wneud i bobl agor lan ychydig. Pan mae gennych chi fol llawn mae’n gwneud gwahaniaeth mawr i’ch lles cyffredinol. Rydyn ni wir wedi dod â’r gymuned yn agosach, a fuasem ni ddim yn gallu gwneud dim o hyn heb FareShare.

Ellie Phillips

The post Tŷ Matthew – sut mae bwyd yn uno’r gymuned appeared first on FareShare Cymru.

Pan mae staff wedi tyfu a meithrin cnwd, does yna ddim byd yn waeth iddyn nhw na gweld bwyd yn mynd yn wastraff. Yn hytrach na’u gadael nhw mewn cae, penderfynon ni y byddai’n syniad da eu cyfrannu i’r fenter wych hon gan FareShare. Mae menter Bwyd Dros ben ag Amcan yn cynnig datrysiad i broblem gwastraff bwyd, gan ein galluogi ni i dalu’n costau medi a llafur am wneud y cyfraniad, fel arall ni fyddai’n ariannol hyfyw i ni wneud.

Matthew Thomas, Rheolwr cyfrif cenedlaethol Puffin Produce

Mae FareShare Cymru yn credu bod bwyd sydd yn fwytadwy bob tro yn well yn cael ei ddefnyddio i fwydo pobl, ac mae Puffin yn cytuno â’r ethos hwn. Bydd y blodfresych nawr yn cael ei ddosbarthu i bobl fregus yma yng Nghymru a hefyd i’n rhwydwaith cenedlaethol o grwpiau cymunedol ac elusennau.

Yn ystod cyfnod mor ansicr i’r byd, dydy’r cyfle i roi bwyd dros ben i elusen erioed wedi bod yn fwy pwysig. Mae’r fenter Bwyd Dros Ben ag Amcan yn hawdd i’w gweinyddu ac mae tîm FareShare yn bleser cydweithio â nhw. 

Matthew Thomas, Rheolwr cyfrif cenedlaethol Puffin Produce

Pan mae tua 2m o’r 3.6m tunnell o fwyd sy’n cael ei wastraffu bob blwyddyn yn dal i fod yn fwytadwy, mae FareShare eisiau sicrhau nad yw hi byth yn rhatach taflu bwyd da, maethlon i ffwrdd nag yr ydyw i’w roi i bobl mewn angen.

Mae’r Gronfa Bwyd Dros Ben ag Amcan wedi galluogi cynhyrchwyr, tyfwyr a gwneuthurwyr o bob maint i gyfrannu eu bwyd dros ben bwytadwy. Gall y gronfa gael ei defnyddio i dalu costau medi, llafur, storio, pecynnu neu gludo bwyd dros ben.

Mae’r rhoddion hyn nid yn unig yn helpu pobl mewn gwir angen, maen nhw hefyd yn helpu ni i gyrraedd targed y cwmni o leihau gwastraff bwyd yn unol â Chytundeb Courtauld 2025.

Matthew Thomas, Rheolwr cyfrif cenedlaethol Puffin Produce

Yn ogystal â bod yn dda i bobl, mae lleihau lefelau gwastraff bwyd eich cwmni yn dda i’r blaned. Gyda’r rhodd o dros 32 tunnell o flodfresych dros ben, mae Puffin Produce wedi defnyddio’r gronfa i rwystro bron i 52 tunnell o CO2 rhag cael ei allyru’n ddi-angen, a dros 49 miliwn litr o ddŵr rhag mynd yn wastraff o’r broses dyfu.  

I drafod bwyd dros ben eich busnes, neu os oes gennych chi gwestiynau, cysylltwch drwy gyfrwng food@fareshare.cymru  

The post Puffin Produce: Gwneud daioni gyda Chronfa Bwyd Dros Ben ag Amcan appeared first on FareShare Cymru.

Hufenfa De Arfon yw cwmni Llaeth Cydweithredol hynaf Cymru, sydd wedi’i berchen gan ffermwyr ers 1938. Maent yn defnyddio llaeth lleol yn unig i gynhyrchu ystod o fenyn a chaws Cymreig o’r ansawdd uchaf sydd wedi ennill sawl gwobr.

Yn Hufenfa De Arfon rydyn ni’n mynychu nifer o sioeau masnach a defnyddwyr yn ystod y flwyddyn. Fel rhan o’r gweithgareddau hyn, yn aml mae gennym arddangosfeydd o gynhyrchion sydd methu ail ymuno â’r gadwyn gyflenwi. Mae FareShare Cymru yn darparu cyfle ardderchog i ni beidio â gwastraffu’r cynhyrchion hyn, a hefyd rydyn ni’n cefnogi elusennau lleol a’r gymuned ar yr un pryd. 

Kirstie Jones, RHEOLWR MARCHNATA, Hufenfa De Arfon

Mae FareShare Cymru yn hynod ddiolchgar am y gefnogaeth rydyn ni wedi’i derbyn gan Hufenfa De Arfon. Mae yna wastad groeso cynnes i ffynonellau o brotein o ansawdd da gan ein grwpiau cymunedol ac aelodau elusen, ac yn aml mae caws yn eitem foethus. Mae SCC yn chwarae rhan allweddol drwy ein helpu ni i ddatrys gwastraff bwyd a newyn ar y cyd.

Mae’r hinsawdd economaidd ar hyn o bryd yn rhoi teuluoedd mewn tlodi bwyd ac ynni ledled Cymru. Fydd hyn yn broblem fwy pan ddaw’r cynnydd o ran pris y cap ynni ym mis Ebrill. Trwy gyfrannu bwyd dros ben i FareShare Cymru, nid yn unig ydyn ni’n lleihau’r effaith ar yr amgylchedd, ond hefyd rydyn ni’n cefnogi’r rhai sydd â’r angen mwyaf yn y gymuned.

Kirstie Jones, RHEOLWR MARCHNATA, Hufenfa De Arfon

The post Llaethdy hynaf Cymru’n cyfrannu drwy roi caws i FareShare Cymru appeared first on FareShare Cymru.

Mae Clwb Cinio Corneli yn lle sy’n codi calon; lle mae ffrindiau’n cwrdd i sgwrsio dros fwyd blasus wedi’i baratoi gan wirfoddolwyr sydd â gwên enfawr ar eu hwynebau. Mae’r clwb cinio yn digwydd ddwywaith yr wythnos gyda chroeso i’r gymuned gyfan ddod i fwynhau pryd tri-chwrs am £5.

Rydyn ni’n mwynhau’r cwmni. Mae’r cawl yn flasus iawn, a’r bwyd hefyd. Alla i ddim gweld bai arno o gwbl!

June Ball, CWSMER CLWB CINIO CORNELI

Mae FareShare Cymru yn darparu bwyd dros ben o safon yn wythnosol sy’n cael ei droi’n bryd bwyd gan y cogyddion gwirfoddol.

Ar gyfartaledd mae tua 30 o bobl yn mynychu pob clwb cinio, a daw’r mwyafrif o’r genhedlaeth hŷn. Yn ogystal â darparu pryd bwyd twym, mae’r clwb yn helpu pobl sy’n teimlo’n ynysig ac yn unig.

Rydych chi wir yn cael gwerth da am eich arian. Rydych chi’n cael pryd da, ac yn cael cwrdd â phobl hefyd.

John Gillard, cwsmer Clwb Cinio Corneli

Mae Liam Turner yn gwirfoddoli bob dydd Mawrth, ar un o’i ddiwrnodau i ffwrdd o’i waith fel cogydd proffesiynol. Yn ôl Liam, mae’n gwybod bod y bartneriaeth rhwng Clwb Cinio Corneli a FareShare Cymru yn hanfodol i’r gymuned, ac yn un fydden nhw ddim am ei cholli.

Mae nifer o bobl yn dod mewn, mae’n gyfle i gwrdd â phobl yn gymdeithasol iddyn nhw, ac mae nifer yn weddwon hefyd. Mae’n hanfodol i nifer o’r bobl hŷn fyddai ddim yn dod allan oni bai am y clwb. Heb FareShare, efallai byddai methu digwydd.

Liam Turner, cogydd gwirfoddol Clwb Cinio Corneli

Un o’r prif resymau mae’r clwb cinio’n defnyddio FareShare Cymru yw’r gost. Ar gyfartaledd mae’r bwyd sy’n cael ei dderbyn gan aelodau FareShare Cymru werth 5-10 gwaith gwerth y ffi misol. Yn ôl Liam, heb FareShare byddai’n rhaid codi’r pris, ac mae’n ansicr y byddai pobl yn mynychu’r clwb wedyn.

Fydden ni methu mynd allan a phrynu’r holl gynnyrch sy’n cael ei ddarparu i ni. Fydden ni methu fforddio gwneud hynny. Cawson ni samwn wythnos ddiwethaf sydd mor ddrud, fydden ni methu mynd allan a’i brynu.

Liam Turner, cogydd gwirfoddol Clwb Cinio Corneli

Mae Liam yn gwirfoddoli achos ei fod yn mwynhau rhoi rhywbeth ‘nôl i’r gymuned. Mae e hefyd yn mwynhau’r dasg o wneud pryd allan o fwyd dros ben.

Rwy’n cynllunio fy mwydlen yn seiliedig ar beth sy’n dod gan FareShare. Rwy wastad yn meddwl “pa ddanteithion ydyn nhw wedi danfon aton ni’r wythnos hon?” Weithiau mae’n gallu bod yn her ond fel cogydd dw i’n eitha’ mwynhau hyn, achos rydych chi’n gallu gweld beth sy’n dod mewn a chynllunio bwydlen yn seiliedig ar hynny.

Liam Turner, cogydd gwirfoddol Clwb Cinio Corneli

Mae FareShare Cymru yn falch i helpu Clwb Cinio Corneli i gefnogi’r gymuned. Os ydych chi eisiau chwarae rhan, naill ai drwy ddod yn aelod, trwy gyfrannu bwyd neu wirfoddoli i ddosbarthu bwyd, yna cysylltwch â ni.

The post Clwb Cinio Corneli appeared first on FareShare Cymru.

“Roedden ni’n ffeindio pan oedd pobl yn cwrdd ac yn sgwrsio, bod pawb yn deall bod gan bobl eraill broblemau hefyd. Efallai’ch bod chi yn gallu helpu rhywun arall â phroblem, wedyn efallai bod rhywun yn gallu eich helpu chi gyda’ch problem chi. Rydych yn datblygu’r ymdeimlad o gymuned.”

ANGELA BULLARD, SYLFAENYDD gwirfoddolwyr cymunedol y Sblot

Ers y pandemig, mae’r clwb brecwast wedi addasu’n wasanaeth cludfwyd ond mae’r angen am gymorth yn fwy nag erioed. Mae Gwirfoddolwyr Cymunedol y Sblot yn helpu 50-80 o bobl bob wythnos, a gallant weld eu bod yn cael effaith.

Mae’n gwneud gwahaniaeth enfawr i nifer o bobl. Mae’n golygu bod egni ganddynt. Mamau sengl sydd â phlant ifanc, sy’n dod mewn â dim egni achos eu bod wedi bod yn bwydo’r plant yn hytrach na nhw eu hunain, a nawr maen nhw’n gallu bwydo’u hun. Ry’n ni’n gweld tipyn o’r fath yna o beth.

Derbynia Gwirfoddolwyr Cymunedol y Sblot fwyd gan FareShare Cymru yn wythnosol, yn ogystal â chasglu bwyd gan archfarchnadoedd lleol. Pan ddaw pobl i gael rôl brecwast twym, maen nhw hefyd yn gallu llenwi bag gyda ffrwythau a llysiau, eitemau becws, prydau parod a.y.b.

Allwn ni ddim goroesi heb y bwyd [gan FareShare Cymru]. Wir, allwn ni ddim goroesi. Dydy’r archfarchnadoedd ddim yn ddibynadwy bob tro, felly heb y bwyd gan FareShare i ddosbarthu’r wythnos ddiwethaf mi fyddai wedi bod yn druenus yma. Byddai pobl wedi bod yn ymddangos heb fod yna fwyd i roi iddyn nhw.

ANGELA BULLARD, SYLFAENYDD gwirfoddolwyr cymunedol y Sblot

Mae’r bwyd gan FareShare Cymru yn fwyd dros ben a fyddai, fel arall, wedi cael ei wastraffu. Daw gan ffermwyr, gwneuthurwyr, cyflenwyr ac archfarchnadoedd. Oherwydd natur y gadwyn gyflenwi, mae yna wastad amrywiaeth yn y bwyd sy’n cael ei gynnig gan Wirfoddolwyr Cymunedol y Sblot.

Rydym llawn cyffro bob wythnos i weld beth gawn ni. Yn ddiweddar, rydym wedi bod yn cael prydau Marks & Spencer. Maen nhw wedi bod yn hynod boblogaidd, achos i rai pobl, maen nhw wir yn achub y dydd. Ddoe, paella oedd genyn ni ac roedd y prydau yn enfawr. Dywedodd un fenyw ei bod hi am fynd ag un i fwydo’i thri o blant. Wnaeth hynny ei harbed rhag gorfod mynd allan a phrynu’r holl gynhwysion, a phryd o fwyd iach oedd e hefyd.

ANGELA BULLARD, SYLFAENYDD gwirfoddolwyr cymunedol y Sblot

Bwriad y sefydliad yw darparu bwyd iachus i bobl, yn ogystal ag addysgu pobl am sgiliau bwyd ar yr un pryd. Cyn y pandemig roedden nhw’n gweithio gyda myfyriwr maeth er mwyn cynllunio ryseitiau. Mae hyn yn rhywbeth mae’r tîm yn gobeithio ail ddechrau unwaith y daw bywyd ‘nôl i normal unwaith eto.

Mae Gwirfoddolwyr Cymunedol y Sblot yn gwneud gwaith gwych yn y gymuned, sy’n cael ei brofi gan y cynnydd yn y rhifau a’r defnyddwyr sy’n dychwelyd dro ar ôl tro.

“Pan ddaeth un o’n menywod gyntaf, roedd hi’n rhiant maeth i fachgen bach. Fe wnaeth hi ymddiried ei bod hi’n dod ag e yna achos ei bod hi am iddo gydnabod nad oedd pob person yn gas, achos ei fod wedi cael tipyn o amser caled. Yn raddol fe enillon ni ei ymddiriedaeth ac fe ddaeth i i garu’r Clwb Brecwast. Dechreuodd e ymddiried mewn pobl, byddai e’n mynd gyda rhai o’r aelodau eraill i chwarae. Erbyn y diwedd fe ddanfonodd hi lythyr aton ni yn dweud ei bod hi methu mynegi mewn geiriau’r gwahaniaeth wnaethon ni i’w fywyd e. Ac oherwydd y gwahaniaeth yna, fe olygodd ei bod hi’n gallu ei fabwysiadu e. Mae e dal yn dod i ymweld nawr.”

ANGELA BULLARD, SYLFAENYDD gwirfoddolwyr cymunedol y Sblot

The post Gwneud gwahaniaeth gyda gwirfoddolwyr cymunedol y Sblot appeared first on FareShare Cymru.

Cwmni sydd werth miliynau o bunnoedd yw Zorba Delicacies, sydd wedi’i sefydlu yng Nglyn Ebwy, De Cymru. Mae’n gwmni sy’n gwneud amrywiaeth o hwmws, dipiau, cawl, prydau pot a brechdanau. O ganlyniad i newidiadau munud olaf, o bryd i’w gilydd mae ganddynt fwyd dros ben, a gan ei fod yn fwyd ffres o’r oergell mae yna berygl y gallai mynd yn wastraff gan mai byr yw’r oes silff.

Mae Zorba wedi bod yn rhoi i FareShare Cymru ers Awst 2021 gan eu bod yn credu mai cynnig eu stoc dros ben i elusen yw’r peth cywir i wneud. Mae FareShare Cymru wedyn yn dosbarthu’r bwyd i dros 170 o grwpiau bwyd cymunedol ledled De Cymru.

Mae’n ein helpu i leihau’n gwastraff ar leoliad, ond hefyd mewn oes lle mae yna gymaint o bryderon byd-eang, mae gwneud daioni yn dod yn bwysicach fyth. Roedd e’n teimlo fel synnwyr cyffredin! Mae FareShare yn gwneud swydd arbennig yn troi problem amgylcheddol yn ddatrysiad.

Jacques Tasker, SWYDDOG MASNACHOL GWEITHREDOL, Zorba Delicacies  

Mae’n gas gan FareShare Cymru weld bwyd yn cael ei wastraffu, felly rydym yn croesawu pob trafodaeth am sut y gallwn ei wneud mor hawdd â phosib i gyfrannu bwyd. Ar hyn o bryd mae’n Cronfa Bwyd Dros Ben ag Amcan Cymru ar gael i gynorthwyo ag unrhyw gostau ychwanegol.

Yr hyn sy’n gwneud FareShare mor dda i weithio gyda nhw yw eu bod yn gwneud y broses gyfrannu stoc dros ben mor hawdd. Pan mae gennym stoc ar gael ar gyfer ei roi, ynghyd â’u staff cyfeillgar, rydym yn trefnu amser casgliad i un o’u faniau oergell ddod i’w gasglu yn rhad ac am ddim.

Jacques Tasker, SWYDDOG MASNACHOL GWEITHREDOL, Zorba Delicacies  

Yn ogystal â helpu rhwystro stoc dros ben rhag mynd i safleoedd tirlenwi, mae perthynas Zorba gyda FareShare Cymru yn boblogaidd gyda’u staff a chwsmeriaid. Mae codi moral staff yn rheswm pam mae busnesau bwyd yn cael budd o gefnogi achosion da. (Sefydliad Cymorth i Elusennau)

Mae FareShare Cymru yn ddiolchgar am y bwyd sy’n cael ei gyfrannu gan Zorba, sy’n ein helpu i fwydo miloedd o bobl fregus bob mis. Rydym yn gobeithio y bydd ein perthynas yn parhau er mwyn ein galluogi i daclo gwastraff bwyd a newyn gyda’n gilydd.

Allwn ni ddim argymell FareShare ddigon. Maen nhw’n ei gwneud hi mor hawdd i fusnesau fel ni wneud daioni, heb i ni fod ar ein colled o gwbl. 

Jacques Tasker, SWYDDOG MASNACHOL GWEITHREDOL, Zorba Delicacies  

The post Danteithion Zorba yn gwneud lles appeared first on FareShare Cymru.

Fferm drefol fach yw Micro Acres Wales, wedi’i sefydlu’r tu allan i Bontypridd; a ddechreuodd dyfu microlysiau yn 2021. Mae microlysiau yn llawn maeth, yn ffynhonnell llawn fitaminau, mineralau a gwrthocsidyddion sy’n gallu cael eu defnyddio ar gyfer nifer o bethau, fel salad, brechdanau ac i addurno prydau bwyd.

Dechreuodd Micro Acres Wales pan dderbyniodd un o’r sylfaenwyr, Chris, ddiagnosis o’r cyflwr niwrolegol prin ‘Ataxia’. Ynghyd â’i bryderon iechyd, fe ysbrydolodd ei deulu o fwytawyr ffyslyd e i ddefnyddio’i ‘fysedd gwyrdd’ a dechreuodd dyfu microlysiau i wneud yn siŵr bod y teulu’n bwyta bwyd llawn maeth.

Mae Micro Acres Wales nawr yn darparu microlysiau i gwsmeriaid preifat, cogyddion, cwmnïau arlwyo, delis a chaffis. Maen nhw hefyd wedi dechrau mynychu marchnadoedd ffermwyr, sy’n golygu bod ganddynt fwyd dros ben ar adegau.

Fel busnes sy’n tyfu gydag ethos cadarn o gynaliadwyedd yn graidd iddo, roedd Micro Acres Wales eisiau lleihau eu lefelau gwastraff, a sicrhau bod y microlysiau yn cael eu defnyddio.

Ar ôl cysylltu â FareShare Cymru, fe archwilion ni’r syniad o ddefnyddio Cronfa Bwyd Dros Ben ag Amcan Cymru i’w gwneud hi’n gost-niwtral iddyn nhw gyfrannu eu microlysiau, gan ddarparu cynnyrch llawn maeth ar gyfer eu rhannu yn ein rhwydwaith. Roedd FareShare Cymru yn gallu ad-dalu’r costau ynghlwm â chynaeafu’r microlysiau, a chostau pacio’r microlysiau mewn cyflwr ‘parod i’w dosbarthu’.

“Rydyn ni wir yn gwerthfawrogi gallu rhoi’n cynnyrch dros ben i ddefnydd da, ac mae cael mynediad i Gronfa Bwyd Dros Ben ag Amcan Cymru wedi bod yn amhrisiadwy. Fel cwmni sy’n tyfu, mae angen i ni gael cydbwysedd rhwng gwneud yr hyn sy’n gyfrifol yn gymdeithasol gyda rheoli’n costau ac alldaliadau ein hun. Mae Cronfa Bwyd Dros Ben ag Amcan Cymru yn ein galluogi ni i sicrhau pan dydy’n microlysiau ni ddim yn fasnachol hyfyw bellach, neu’n dod tuag at ddiwedd eu hoes, ond yn berffaith ddiogel i fwyta, eu bod nhw’n gallu gwneud llawer o ddaioni i bobl fregus.”

DONNA GRAVES, CYD SYLFAENYDD MICRO ACRES WALES

“Rydyn ni yn FareShare Cymru yn cydnabod pa mor hanfodol yw e bod gan bobl fynediad at lysiau a chynnyrch ffres fel rhan o’u deiet. Yn anffodus, mae cymunedau bregus yn aml yn gweld y rhain fel y pethau caletaf i gael mynediad atynt. Rydym wrth ein bodd i allu gweithio gyda Micro Acres Wales i sicrhau bod eu microlysiau yn ychwanegu maethynnau hanfodol i ddeiet ein rhwydwaith o aelodau ledled Cymru.”

SARAH GERMAIN, PRIF SWYDDOG GWEITHREDOL FARESHARE CYMRU

I ddarganfod sut y gallwch chi ei wneud yn gost-niwtral i roi bwyd dros ben eich busnes gan ddefnyddio Cronfa Bwyd Dros Ben ag Amcan Cymru, cliciwch yma.

The post Microlysiau llawn maeth yn cael eu rhoi i elusen diolch i Gronfa Bwyd Dros Ben ag Amcan Cymru appeared first on FareShare Cymru.

Mae Hanfodion Seiber yn achrediad a gafodd ei ddatblygu gan Ganolfan Seiberddiogelwch Cenedlaethol Llywodraeth y DU. Edrycha Hanfodion Seiber ar wella seiberddiogelwch mewn meysydd fel systemau gweithredu cyfrifiaduron, cyfrineiriau ac ymwybyddiaeth staff.

Rydym yn ddigon ffodus i gael perthynas dda gyda’r ymgynghorwyr diogelwch Pen Test Partners, sydd yn ardystwyr cydnabyddedig Hanfodion Seiber. Mae Pen Test Partners yn angerddol am yr hyn rydyn ni’n ei wneud, felly fe gynigon nhw ein harwain drwy’r broses.

Gyda chefnogaeth gan Tom yn Pen Test Partners, fe weithion ni drwy’r anghenion a gwella’r meysydd oedd angen eu newid neu eu gwella yn ein hisadeiledd Technoleg Gwybodaeth. Diolch i gymorth Tom, fe basion ni Hanfodion Seiber y tro cyntaf! Wrth i dechnoleg esblygu, mae angen ail-wneud yr achrediad yn flynyddol er mwyn sicrhau bod FareShare Cymru mor seiberddiogel ag y gallwn fod.

The post Rydyn ni wedi’n hachredu gan Hanfodion Seiber! appeared first on FareShare Cymru.